လါမ့ၤ ၃၁ သီ၊၂၀၂၃နံၣ်
ကညီကီၢ်စဲၣ် ဖၣ်အၣ်ဝ့ၢ်ကွဲၤကဘီကစၢၢ်ခီၣ်ထံး Zwekabin Valley ဟိၣ်ထဲလ်အပူၤ ဒူၣ်ရ့ၣ်သၣ်မူးပွဲလၢဘၣ်တၢ်ရဲၤကျဲၤမၤအီအံၤအပူၤ ဒူၣ်ရ့ၣ်သၣ်လၢၤဝဲအဖျၢၣ်၅၀၀လၢတနၣ်ရံၣ်အတီၢ်ပူၤန့ၣ် ပှၤလၢရဲၤကျဲၤမၤမူးပွဲ ညံၣ်သုးတ ကျးကစၢ်တဲဝဲန့ၣ်လီၤ
ဖဲလါမ့ၤ ၂၇သီ မုၣ်ထူၣ် ၁၂နၣ်ရံၣ်ဃၣ်ဃၣ်အဆၢကတီၢ် Zwekabin Valley ဟိၣ်ထဲလ်အပူၤ ပှၤမၤဝဲဒူၣ်ရ့ၣ်သၣ်မူးပွဲဒီး ဖဲမူးဝဲန့ၣ်ပှၤဟဲအါအါဂီၢ်ဂီၢ်အဃိ ဒူၣ်ရ့ၣ်သၣ်အဖျၢၣ် ၅၀၀လၢၤကွံာ်ဖဲတနၣ်ရံၣ်အတီၢ်ပူၤဒီး ခီဖျိလၢဒူၣ်ရ့ၣ်သၣ်တလၢအဃိပှၤတမှံၤလၢအဟဲဝံၤတအီၣ်ဘၣ်ဝဲ ၂၅ဂၤအံၤ ဘၣ်တၢ်က့ၤဟ့ၣ်လီၤအဝဲသ့ၣ်စ့န့ၣ်အဝဲတဲဝဲဒၣ်န့ၣ်လီၤ
“ပှၤဟဲအီၣ်တၢ်ဖဲမူးပွဲတဘျီညါအံၤ ပှၤကညီနီၢ်ဂံၢ်ကအိၣ် ၁၅၀ဃၣ်ဃၣ်လီၤ ပှၤအီၣ်ဘၣ်နီၢ်ဂံၢ်အိၣ် ၁၃၀ဘျဲၣ်လီၤ ပပာ်ပနီၢ်ဃးတၢ်ဆၢကတီၢ်စးထီၣ်လၢ၁၂နၣ်ရံၣ်တုၤ ၃နၣ်ရံၣ်သနာ်က့ ၁၁နၣ်ရံၣ်တခီန့ၣ်ပှၤဟဲတုၤအိၣ်၁၀၀ဃၣ်ဃၣ်လံ ပစးထီၣ်အီၣ်လၢ၁၂နၣ်ရံၣ်လီၤ ပရဲၤကျဲၤဃးနီၢ်တဂၤန့ၣ် ဒူၣ်ရ့ၣ်သၣ်ဖးဒိၣ်၅ဖျၢၣ်လီၤ ဘၣ်ဆၣ်တနၣ်ရံၣ်အတီၢ်ပူၤလၢၤကွံာ် အဖျၢၣ်၅၀၀ဘျဲၣ်လီၤ ပှၤပှ့ၤဃးလံာ်အုၣ်သးတနီတအီၣ်ဘၣ်ဘၣ်အဃိ ဘၣ်တဲနၣ်ပၢၢ်က့ၤပှၤတမှံၤလၢအိၣ်တ့ၣ်၂၅ဂၤဒီး ဘၣ်မၤက့ၤ refund လီၤ” န့ၣ်အဝဲတဲလီၤ
ပှၤလၢဟဲမူးပွဲတဘျီအံၤ တဂၤတဲဝဲ”အီၣ်ဝံၤဒိၣ်မးလီၤ ရဲၤကျဲၤဃးဝဲနာ်က့ဘၣ်ဘျီးဘၣ်ဒါလီၤ တၢ်တနံၤန့ၣ်တၢ်သၣ်ကအိၣ်ဝဲ ၅၀၀/၆၀၀ဃၣ်ဃၣ်လီၤ သနာ်က့လၢၤချ့လီၤ ယဲယအိၣ်ခိးအီၣ်လီၤ ဒူၣ်ရ့ၣ်သၣ်တဖၣ်နာ်က့ဝံၤဒိၣ်မးလီၤ”န့ၣ် တဲဝဲဒၣ်လီၤ
ဖဲတၢ်အီၣ်သကိးဒူၣ်ရ့ၣ်သၣ်မူးပွဲအံၤ ပှၤတူၢ်လိၣ်ဒီးဒူအီၣ်ဝဲ ဒူၣ်ရ့ၣ်သၣ်အဖျၢၣ်၅၀၀ဘျဲၣ်တကးဒံးဘၣ် ဒူၣ်ရ့ၣ်သၣ်ကံၣ်လိၣ်ဝၣ်ဒၢ ၁၅၀ ၊သၣ်ကပၢၢ်သၣ်၃၆ကံၣ်လိၣ်န့ၣ်လီၤ
တၢ်သူတၢ်သၣ်လၢပှၤဟ့ၣ်ဒူအီၣ်အပှ့ၤအိၣ်ဝဲ ၄၃ကလီၤဃၣ်ဃၣ်ဒီး မူးပွဲကကဲထီၣ်အဂီၤ ခဲလၢာ်ပာ်ဖှိၣ်လၢၤဝဲ ၅၅ကလီၤ န့ၣ်လီၤ ဖဲဆါလီၤလံာ်အုၣ်သးန့ၣ် န့ၣ်က့ၤဝဲ ၂၂ ကလီၤ လီၤ
ဖဲအပူၤကွံာ် ၂၀၂၂နံၣ် ဒူၣ်ရ့ၣ်သၣ်မူးပွဲအခါ ပှၤတမှံၤဟဲအိၣ်ဒၣ် ၇၅ဂၤနာ်က့ အခဲ ၂၀၂၃ နံၣ်အံၤ ပှၤဟဲအါထီၣ် ၁၅၀တကးဒံးဘၣ် လါ June ၊July ၊August တဖၣ်နာ်က့ ကမၤဝဲဒူၣ်ရ့ၣ်သၣ်မူးပွဲလၢခံတဝီဒံးန့ၣ် ညံၣ်သုးတး ကျးကစၢ်တဲဝဲန့ၣ်လီၤ
