လါမ့ၤ ၂၉ သီ၊၂၀၂၃နံၣ်
ကညီကီၢ်စဲၣ် ကီးတရ့းကလံၤစိးတကပၤသဝီတဖၣ်အပူၤ ပယီၤသုးခးလီၤကျိဖးဒိၣ်ကိးမုၢ်နံၤန့ၣ် ကီးတရ့းဝ့ၢ်ဟီၣ်ကဝီၤဖိတဲဝဲန့ၣ်လီၤ
ပယီၤသုးစုဖီလာ် ခလရ၉၇ဒီး လ့ၢ်ဝကျိဖးဒိၣ်လုၢ်ခးလီၤကျိဖးဒိၣ်ဆူ ကီးတရ့းကလံၤထံး တီၣ်ကၠၣ်အ့သဝီ၊ရဲၣ်ဂိးသဝီ၊ကၠီၣ်ရှၢ်ကိသဝီ၊ကမ့ၣ်ကိသဝီတကပၤ တၢ်ဒုးတအိၣ်နာ်က့ စးထီၣ်ဖဲလါအ့ဖြ့ၤန့ၣ် ပယီၤသုးခးလီၤကျိဖးဒိၣ်တနံၤ အဝီ၁၀ ဃၣ်ဃၣ်န့ၣ်လီၤ
ခီဖျိလၢခးလီၤတၢ်ဒ်အံၤအဃိ ကီးတရ့းကလံၤထံးတကပၤသဝီတဖၣ်အပူၤ ကျိဖးဒိၣ်လီၤတဲၤပိၣ်ဖးထီၣ်ဒီး ကမျၢၢ်ဘၣ်ဒိအိၣ်န့ၣ် သဝီဖိတဖၣ်တဲဝဲန့ၣ်လီၤ
“အဝဲသ့ၣ်ခးလီၤဖဲအဲၣ်ဒိးခးလီၤဝဲလီၤ တၢ်ဒုးတအိၣ်နာ်က့တနံၤခးဝဲ အဘျီ၁၀ဃၣ်ဃၣ်လီၤ ဘၣ်ကျီၣ်ဘၣ်ပှၤကညီ ရွၣ်တဲရှၣ် သဝီပူၤကျီၣ်သံခံဒူ လၢခံတသီ ကမ့ၣ်ကိပူၤပှၤကညီဘၣ်ဒိခံဂၤ ကၠၣ်အ့ကိသဝီပူၤဟံၣ်ဟးဂီၤတဖျၢၣ် ပှၤကညီတဘၣ်ဒိဘၣ် ဘၣ်သိလ့ၣ်လီၤ “န့ၣ်ကီးတရ့းကလံၤစိးတကပၤသဝီဖိတဂၤတဲဝဲဒၣ်န့ၣ်လီၤ
တကးဒံးဘၣ် ဖဲလါမ့ၤ ၂၈သီအနံၤ ပယီၤသုး ခလရ၉၇ ခးလီၤကျိဖးဒိၣ်တဖျၢၣ်အံၤ လီၤတဲၤပိၣ်ဖးထီၣ်လၢ ကီးတရ့းဝ့ၢ် ခန့မုၣ်ကဝီၤဒ့ပူၤ ရူဖးဒိၣ်ကပၤအဃိ ဟီၣ်ကဝီၤဖိခံဂၤသံန့ၣ် ကီးတရ့းဝ့ၢ်ဟီၣ်ကဝီၤဖိတဲဝဲန့ၣ်လီၤ
“ပှၤဘၣ်ခံဂၤန့ၣ် တံဖိကၠါဒီးအမါ လီၤဖဲတၢ်သွၣ်ခိၣ်ကပၤရူဒီးသံဖဲန့ၣ်တဘျီဃီခံဂၤလီၤ ဖဲန့ၣ်တကပၤ လီၤတဲၤတပယူၤဃီလီၤ ပှၤအိၣ်ဖဲန့ၣ်တဖၣ်အိၣ်ဒံးဝဲလီၤ ခးလီၤဝဲဝံၤကဘီယူၤဟဲလီၤ တခးလီၤတၢ်ဘၣ်”န့ၣ်ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
ခီဖျိလၢခးလီၤကျိဖးဒိၣ်အဃိ ကီးတရ့းကလံၤထံးတကပၤသဝီဖိတဖၣ် ကိးမုၢ်နံၤတၢ်ဖံးအီၣ်မၤအီၣ်အဂီၤ ဘၣ်မၤဝဲလၢတၢ်ပျံၤတၢ်ဖုးအပူၤန့ၣ်လီၤ
တကးဒံးဘၣ် ပယီၤသုးတဖၣ်အံၤ မၤဟးဂီၤကျဲလၢ ကီးတရ့းကလံၤထံးသဝီအဃိ ဟီၣ်ကဝီၤဖိတဖၣ်ဘၣ်သဂၢၢ်ဒီး တၢ်လဲၤတၢ်က့ၤ တၢ်အိၣ်ဆူၣ်အိၣ်ချ့တၢ်ကီတၢ်ခဲတဖၣ်န့ၣ်လီၤ
