လါမ့ၤ ၂၇သီ၊၂၀၂၃နံၣ်
ကညီကီၢ်စဲၣ် ဖၣ်အၣ်ဝ့ၢ်ပူၤ ကွဲၤကဘီကစၢၢ်ခီၣ်ထံး Zwekabin Valley ဟီၣ်ထဲလ် အပူၤ ပှၤရဲၣ်ကျဲၤမၤဝဲ ဒူၣ်ရ့ၣ်သၣ်ဘူၣ်ဖ့မူးပွဲ ခံဝီတဝီဖဲ လါမံၤ ၂၇ သီတုၤ မုၢ်ထူၣ် ၁၂နၣ်ရံၣ်တုၤ ၃နၣ်ရံၣ်န့ၣ်သ့ၣ်ညါဘၣ်န့ၣ်လီၤ
ပှၤလၢဟဲလၢ ဒူၣ်ရ့ၣ်သၣ်မူးပွဲတဘျီအံၤန့ၣ် ဘၣ်တၢ်တုၢ်လိၣ်အီၤဒီး ဒူၣ်ရ့ၣ်သၣ် အဖျၢၣ် ၅၀၀၊မၣ်ကူၣ်သၣ် ဒီး သၣ်ကပၢၢ်သၣ်တဖၣ်န့ၣ်လီၤ တၢ်မၤမူးပွဲတဘျီအံၤန့ၣ်ဒ်သိး တၢ်ဟးလိၣ်ကွဲတၢ်မၤအကျိၤအကွာ်ကလဲၤထီၣ်လဲၤထီအဂီၤဒီး ကမၤဒိၣ်ထီၣ်အါထီၣ် ဟီၣ်ကဝီၤတၢ်အီၣ်တၢ်ဆါတၢ်ပှ့ၤအဂီၤန့ၣ် ညံၣ်သူးတ တၢ်ဆါကျးကစၢ်တဲဝဲန့ၣ်လီၤ
“အခဲအံၤမ့ၢ်ခံဝီတဝီလီၤ ဒူၣ်ရ့ၣ်သၣ်အဖျၢၣ် ၅၀၀ဘျဲၣ် တကးဒံးဘၣ် ထုးထီၣ်ဃးအတြိၤဒီးအဒၢကအိၣ်လီၤ အဒၢဖိ(ဗူး)ဝဲန့ၣ်ကအိၣ် ၁၅၀၊၂၀၀ဃၣ်ဃၣ်လီၤ ပှၤကွဲးထုးထီၣ်အတြိၤဒီးပှၤထၢနုာ်ဃးမီနီ သၣ်ကပၢၢ်သၣ်န့ၣ်ကံၣ်လိၣ် ၄၀ဒီး မၣ်ကူၣ်သၣ်ပထၢနုာ်ဃး အဖျၢၣ်၃၀၀ဃၣ်ဃၣ်လီၤ”န့ၣ် အဝဲတဲဒၣ်န့ၣ်လီၤ
တကးဒံးဘၣ်မူးပွဲတဘျီညါအံၤအဂီၤလံာ်အုၣ်သးန့ၣ် ပှၤပှ့ၤန့ၣ်ဖဲ ဖၣ်အၣ်ဝ့ၢ် ထံကျိနံၤကျဲ Crown (Hpa-An) Souvenir & Gift Shop ဒီးပာ်ပနီာ်ဃးပှၤကညီနီၢ်ဂံၢ် ၁၀၀ဘျဲၣ်ဝံၤ ပှၤအဒိၣ်နီၢ်တဂၤ ၂၅၀၀၀ဘး ဖိသၣ်နီၢ်တဂၤ ၁၂၅၀၀ ဘးန့ၣ်လီၤ
“မူးပွဲလံာ်အုၣ်သးန့ၣ် ပကးတံၤကွံာ်အီဖဲ ၂၅သီန့ၣ်လီၤ ပှၤကအိၣ်ဟဲလၢ ဝ့ၢ်တကူၣ်၊မါဒလ့၊ပဂိ၊မီၣ်လမၠ့ၣ် တဖၣ်န့ၣ်လီၤ ဖိသၣ်သးနံၣ်သၢနံၣ်ဆူဖီလာ်ပတဟံးန့ၣ်စ့ဘၣ် သၢနံၣ်ဆူအဖီခိၣ်ပဟံးန့ၣ် ၁၂၅၀၀လီၤ ခီဖျိလၢဘူၣ်ဖ့အဃိ အီၣ်ဖဲအံၤတုၤဘျဲအီၣ်န့ၣ်လီၤ က့ၤစိၤဒူတန့ၣ်ဘၣ်မီ ဟဲအီၣ်သကိးဖဲအံၤမုာ်မုာ်ဒ်န့ၣ်မီနီ “န့ၣ်အဝဲတဲဝဲလီၤ
ဖၣ်အၣ်ဝ့ၢ်ပူၤဟီၣ်ကဝီၤဖိတဂၤဘၣ်ဃးဒီးမူးပွဲတဘျီအံၤန့ၣ် တဲဝဲ ပမ့ၢ်အီၣ်တဂၤန့ၣ် ၂၅၀၀ ဘးမးန့ၣ်အီၣ်တလၢၤဘၣ်န့ၣ်လီၤ
လၢမူးပွဲတဘျီညါအံၤအပူၤ ဆါဝဲ ကညီကီၢ်စဲၣ်တၢ်ပီးတၢ်လီဟးထီၣ်တဖၣ်လၢအမ့ၢ်ဝဲ ကညီဆ့ကၣ်ထါသ့ၣ်တဖၣ်လီၤ ဖဲအပူၤကွံာ် ၂၀၂၂ နံၣ် အခါနာ်က့ ဒူၣ်ရ့ၣ်သၣ်မူးပွဲအံၤဘၣ်တၢ်မၤအီၤဖဲ ဖၣ်အၣ်ဝ့ၢ် Veranda Cafe န့ၣ်လီၤ
