ကီးတရ့းကီၢ်ဆၣ်ပူၤ သဝီတဖျၢၣ် ပယီၤသုးခးလီၤမ့ၣ်ပိၤအဃိတၢ်ဘါယွၤသရိၣ်ဒီးတၢ်သူၣ်ထီၣ်ဟးဂီၤ ၈ဖျၢၣ်ဃၣ်ဃၣ်ညါ

လါမ့ၤ ၂၄သီ၊၂၀၂၃နံၣ်
ကညီကီၢ်စဲၣ် ၊ကီးတရ့းကီၢ်ဆၣ်အပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်KNLA ၂၀၁ ဟီၣ်ကဝီၤပူၤ သဝီတဖျၢၣ် ပယီၤသုးဟဲခးလီၤမ့ၣ်ပိၤဒီးကဘီယူၤအဃိတၢ်ဘါယွၤသရိၣ်တဖျၢၣ်ဒီးတၢ်သူၣ်ထီၣ်ဟးဂီၤ၈ဖျၢၣ်န့ၣ်ဟီၣ်ကဝီၤဖိတဲဝဲန့ၣ်လီၤ

မီခံသဝီကရူၤ၊ပနွဲၣ်ဖိကျိသဝီအချၢ ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်တၢ်ဒုးကဲထီၣ်သၢသီဝံၤအလီၢ်ခံ ပယီၤသုးဟဲခးလီၤမ့ၣ်ပိၤဒီးကဘီယူၤဆူ ပနွဲၣ်ဖိကျိသဝီပူၤဖဲ လါ့ၤ၂၃သီ မုၢ်နၤအနၣ်ရံၣ်၁၀ အမံးန့း ၃၀ န့ၣ်လီၤ

ခီဖျိလၢဟဲခးလီၤမ့ၣ်ပိၤဒ်အံၤအဃိ တၢ်ဘါယွၤသရိၣ်ဒီး သရိၣ်ကရၢၤပူၤ တၢ်သူၣ်ထီၣ်ဘၣ်ဒိဟးဂီၤ ၈ဖျၢၣ်ဃၣ်ဃၣ်န့ၣ် ပနွဲၣ်ဖိကျိသဝီဖိပိၣ်မုၣ်တဂၤတဲတဲဒ်အံၤလီၤ

“တချူးဟဲခးလီၤမ့ၣ်ပိၤန့ၣ်တၢ်ဒုးကဲထီၣ်လီၤ ကဲထီၣ်လၢသဝီကပာ်လီၤ သဝီပူၤတကဲထီၣ်ဘၣ် တၢ်ဘၣ်ဒိအါမးလီၤ တၢ်ဘါယွၤသရိၣ် ၊ပိၣ်ခွါဘီဒၢၣ်၊အီၣ်မ့ၤလီၤ တၢ်ကိၣ်ခါဆၢကတီၢ်ကၠိတထီၣ်အဃိပှၤကညီဘၣ်ဒိတအိၣ်ဘၣ် ဟဲခးလီၤဝဲခံဖျၢၣ်လီၤ”န့ၣ်အဝဲတဲဝဲလီၤ

ခီဖျိပယီၤသုးဟဲခးလီၤတၢ်ဒီးကဘီယူၤလၢသဝီပူၤအဃိ သဝီဖိနီၢ်ဂံၢ် ၂၅၀ဃၣ်ဃၣ်အံၤ အိၣ်ဝဲဖဲပနွဲၣ်ဖိကျိသဝီပူၤတဘူၣ်ဒီးဆၢကတီၢ်ခဲအံၤဘၣ်ဟးစံၣ်အိၣ်ဝဲဆူ ကစၢၢ်ကစူး ၊လၢၢ် ၊လ့ သ့ၣ်တဖၣ်န့ၣ်လီၤ

ပယီၤသုးခးလီၤမ့ၣ်ပိၤဒီးကဘီယူၤဆူပနွဲၣ်ဖိကျိသဝီပူၤအံၤမ့ၢ်ခံဘျီတဘျီဒီးဖဲအပူၤကွံာ်လါဖ့ၣ်ဘြူၤအါရံၤအခါနာ်က့ ဟဲခးလီၤဝဲဒ်အံၤအဃိ သဝီဖိသးနံၣ် ၄၅နံၣ်တဂၤဘၣ်ဒိဒီးမ့ၣ်ပိၤအက့တကးဒံးဘၣ်ဟံၣ်ဟးဂီၤတဖျၢၣ်န့ၣ်လီၤ