လါမ့ၤ ၂၄၊၂၀၂၃နံၣ်
ကညီကီၢ်စဲၣ် ကီးတရ့းကလံၤစိးတကပာ် သဝီတဖၣ်အပူၤ ခီဖျိပယီၤသုးမၤဟးဂီၤကျဲဒီး ပာ်ပနီာ်ဃးပှၤဆှၢထီၣ်ဃုသးအဃိ ဘၣ်သဂၢၢ်ဒီးဃုသးတလၢတၢ်ကီတၢ်ခဲန့ၣ်ဟီၣ်ကဝီၤဖိတဲဝဲန့ၣ်လီၤ
ကီးတရ့းကလံၤစိးသဝီတၣ်လၢအမ့ၢ် ကမ့ၣ်ကိ၊လီက့ၣ်၊တီၣ်ကၠၣ်အ့သဝီကျဲတဖၣ် ပယီၤသုးမၤဟးဂီၤဒီးပၣ်ပနီၤဃးပှၤပှ့ၤဆါဃုသးန့ၣ်လီၤ
ခီဖျိကျဲတဖၣ်ဘၣ်တၢ်မၤဟးဂီၤအဃိ ကီးတရ့းကလံၤစိးသဝီတဖၣ် တၢ်ကီတၢ်ခဲအိၣ်ထီၣ်လၢကပှ့ၤဃုသးဒီး ဘၣ်သဂၢၢ်ဝဲဃုသးတလၢတၢ်ကီတၢ်ခဲန့ၣ်ဟီၣ်ကဝီၤဖိတဂၤတဲဝဲဒ်အံၤလီၤ
“ဘၣ်ပှ့ၤဃုသးကီဒိၣ်မးလီၤ လၢဟံၣ်နာ်က့ဃုသးအိၣ်တ့ၢ်ဒၣ်တတဲၣ်လီၤ ဃုသးမ့ၣ်လၢာ်ဘၣ်အီၣ်က့ၤမနုလဲၤမးတသ့ၣ်ညါဘၣ် ကဘၣ်ဟးဃုပှ့ၤဃုသးလီၤ ဘၣ်လဲၤပှ့ၤလၢကီးတရ့းဝ့ၢ်ပူၤလီၤ ကီးတရ့းနာ်က့ဃုပှ့ၤထီၣ် ပှၤဆါဃုသးနာ်က့လီၤစှၤလီၤ တနီကးတံၤကွံာ်ပဲတြီလံ “န့ၣ်တီၣ်ကၠၣ်အ့သဝီကမျၢၢ်တဂၤတဲဝဲလီၤ
ပယီၤသုးမၤဟးဂီၤဃးကျဲတကးဒံးဘၣ် မူခိၣ်စူၤအဃိ ထံပှဲၤလၢကျဲပူၤဒီးကဟးထီၣ်လ့ၢ်လိၣ်အဂီၢ်ဘၣ်သဂၢၢ်ဒီးတၢ်ကီတၢ်ခဲန့ၣ်ကီးတရ့းကလံၤစိးဟီၣ်ကဝီၤဖိတဲဝဲန့ၣ်လီၤ
“အခဲအံၤကျဲတဖၣ်နာ်က့ဘၣ်တၢ်မၤဟးဂီၤ ကျဲဖးဒ့လၢအဂုၤအဂၤနာ်က့ မူခိၣ်စူၤအဃိ ပှဲၤဒီးထံလီၤ လဲၤတန့ၣ်ဘၣ် လၢညါခါကီးနွဲးတကပာ်ကျဲဂ့ၤ အခဲမ့ၢ်လဲၤဘၣ်တၢ်သမံသမိးဖးယံၤညါလီၤ အဃိတလဲၤဘၣ် ဃုသးပှ့ၤလၢကီးတရ့းမ့ၢ်တန့ၣ်ကဘၣ်ဟးဃုပှ့ၤလၢတၢ်လီၢ်အဂၤလီၤ “န့ၣ်ဟီၣ်ကဝီၤဖိတဂၤတဲတဲလီၤ
လၢညါဃုသးဘျ့ ၆တလီးတတဲာ်န့ၣ် ဘၣ်ဟ့ၣ်ဒၣ်၂၀၀၀၀ဘျဲၣ်သနာ်က့ အခဲဘၣ်ပှ့ၤဝဲ ၃၈၀၀၀ ညါန့ၣ်ကီးတရ့းဝ့ၢ်ဟီၣ်ကဝီၤဖိတဲဝဲဒၣ်န့ၣ်လီၤ
တကးဒံးဘၣ်ပယီၤသုးထုးထီၣ်ဃးတၢ်ကလုာ်လၢကဘၣ်တီာ်ဒၣ်ဃုသး၅တဲာ်ဒီးမ့ၢ်တီာ်ဝဲအါကဘၣ်တၢ်ဟံးန့ၣ်အရ့န့ၣ်လီၤပယီၤသုးတဖၣ်အံၤ အိၣ်ခိးဝဲဖဲဝ့ၢ်နုာ်လီၤဟးထီၣ်အလီၢ်တဖၣ်ဒီးသိလ့ၣ်တီာ်ဃုသးတခိၣ်န့ၣ်ဃ့ဝဲ ၅၀၀၀တုၤ၁၀၀၀၀န့ၣ် ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
ပယီၤသုးတဖၣ်အံၤမၤဟးဂီၤကွံာ် ကီးတရ့းကလံၤထံးကျဲတဖၣ်ဖဲလါမ့ၤ ၈သီအနံၤဒီးပာ်ပနီာ်ဝဲတၢ်ဆှၢထီၣ်ဃုသးအဃိ တီၣ်ကၠၣ်အ့သဝီ၊လီက့ၣ်သဝီ၊ဖါကၠးသဝီ ၊ကမ့ၣ်ကိသဝီဒီးသဝီအဖျၢၢ်၃၀ဃၣ်ဃၣ်အံၤဘၣ်သဂၢၢ်ဒီး တၢ်ကီတၢ်ခဲန့ၣ်လီၤ
