ပယီၤသုးဆီလီၤသးဖဲကီးတရ့း ခလရ ၉၇ သုးဘၣ်တၢ်နုာ်လီၤခးဝံၤအလီၢ်ခံပှၤဘၣ်တၢ်ဖှီၣ်အီၤအကျါ ထူၣ်ဖျဲးထီၣ်ဒၣ်တဂၤဒံးလီၤ

လါမ့ၤ ၂၃၊၂၀၂၃နံၣ်

ကညီကီၢ်စဲၣ် ကီးတရ့းဝ့ၢ် ခလရ ၉၇သုးကျၢၤ ဘၣ်တၢ်နုာ်လီၤခးအီဖဲ လါမ့ၤ၈သီအနံၤခီဖျိ PDFသုးပာ်ဖှိၣ်တဖၣ်ဝံၤအလီၢ်ခံ ကီးတရ့းဟီၣ်ကဝီၤဖိ၄၀ဘျဲၣ်ဘၣ်တၢ်ဖှီၣ်ဃးအီဒီး တုၤခဲအံၤထူၣ်ဖျဲးထီၣ်က့ၤဒၣ်တဂၤဒံးန့ၣ်သ့ၣ်ညါဘၣ်လၢကီးတရ့းဝ့ၢ်ဟီၣ်ကဝီၤဖိအိၣ်န့ၣ်လီၤ

ပယီၤသုးဆီလီၤသးဖဲကီးတရ့း ခလရ ၉၇သုးကျၢၤဘၣ်တၢ်ခးအီဝံၤအလီၢ်ခံ ကီးတရ့းဝ့ၢ်ပူၤ ပှၤလၢထီဒါပယီၤသုးတဖၣ် ၊CDMပှၤမၤတၢ်ဖိတဖၣ်၊NLDတၢ်မၢဖိတဖၣ် ဒီးပှၤမၤစၢၤတၢ်ဖိနီၢ်ဂံၢ်ပာ်ဖှိၣ် ၄၀ဘျဲၣ်အံၤ တုၤခဲအံၤဘၣ်တၢ်ဖှီၣ်ဃးအီအိၣ်ခံနွံလံန့ၣ်လီၤ

ပှၤလၢဘၣ်တၢ်ဖှီၣ်ဃးတဖၣ်အံၤ အိၣ်ဖဲ ကီးတရ့းပၢၢ်ကီၤဝဲၢ်လီၢ်ဒီးဆၢကတီၢ်ခဲအံၤဟ့ၣ်စ့အဃိ ဟးထီၣ်န့ၣ်ဒံးဒၣ်တဂၤဒံးန့ၣ်ဟီၣ်ကဝီၤဖိတဲဝဲဒၣ်န့ၣ်လီၤ

“ပှၤဘၣ်တၢ်ဖှီၣ်ဃးအကျါဟးထီၣ်န့ၣ်ဒၣ်တဂၤဒံးလီၤ ပှၤအဂုၤအဂၤတဖၣ်တနာ်ဟူဟးထီၣ်ဘၣ် ပှၤလၢဟးထီၣ်တဂၤအံၤဘၣ်ဟ့ၣ်စ့အကလီၢ်၁၀၀လီၤ အဝဲမၤထံအီ တၢ်မၤလီၤ”န့ၣ်ကီးတရ့းဝ့ၢ်ဟီၣ်ကဝီၤဖိတဲဝဲဒၣ်န့ၣ်လီၤ

ကီးတရ့းဝ့ၢ်ပူၤပယီၤသုးသမံသမိးဃံးထီၣ်တၢ်န့ၣ်လၢညါဒီး ခးလီၤကျိဖးဒိၣ်ကိးမုၢ်နၤဃၣ်ဃၣ်န့ၣ်ကီးတရ့းဝ့ၢ်ဟီၣ်ကဝီၤဖိတဲဝဲဒၣ်န့ၣ်လီၤ

“သမံသမိးဝဲခဲလၢၢ်လီၤ မဂီၤန့ၣ်သမံသမိးဝဲဖဲ EPCရူကပၤလီၤ သုးသိလ့ၣ်တဖၣ်အိၣ်လီၤ သိလ့ၣ်ယီၢ်တဖၣ်န့ၣ်သမံသမိးဝဲဖဲ ဖၠါတၢ်နုာ်လီၤဟးထီၣ်အလီၢ်လီၤ မၢအိးထီၣ်ဝဲသိလ့ၣ်ယီၢ်အခံဒၢဒီးသမံသမိးဝဲလီၤ ကျိဖးဒိၣ်ကလုၣ်နာ်ဟူဘၣ်ကိးဟါဒဲးလီၤ ပှၤကညီဘၣ်ဒိဒုတနာ်ဟူဘၣ်”န့ၣ်ဟီၣ်ကဝီၤဖိတဲဝဲန့ၣ်လီၤ

တကီၢ်ခါခဲအံၤ ပယီၤသုးတဖၣ်မၤဃံးထီၣ်တၢ်သမံသမိးတကးဒံးဘၣ် မၤဟးဂီၤကျဲလၢကီးတရ့းအဃၢၢ်သဝီတဖၣ်အဃိ ကီးတရ့းဝ့ၢ် ၊ကၠူတုၤဒီးသဝီအဂုၤအဂၤတဖၣ်အပူၤကမျၢၢ်တဖၣ်ဘၣ်သဂၢၢ်ဒီးတၢ်ကီတၢ်ခဲလၢ တၢ်ဟးထီၣ်က့ၤလီၤတကးဒံးဘၣ် တၢ်အိၣ်ဆူၣ်အိၣ်ချ့အဂီၤန့ၣ်တၢ်ကီတၢ်ခဲအိၣ်ထီၣ်န့ၣ်ဟီၣ်ကဝီၤဖိတဲဝဲဒၣ်န့ၣ်လီၤ