အထူးစစ်ဆင်ရေးတပ်ဖွဲ့ – S.O.F ၏ အထူးလက်ဖြောင့်မွမ်းမံသင်တန်းဆင်း
မော်လမြိုင်၊ မေ၊ ၂၁
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ တောင်ပိုင်းစစ်ဒေသကွပ်ကဲရေး၊ အထူးစစ်ဆင်ရေးတပ်ဖွဲ့ – S.O.F ၏ အထူးလက်ဖြောင့်မွမ်းမံသင်တန်းအား စစ်ဒေသခွဲအမှတ် ၃ နယ်မြေအတွင်း မေလ ၁၉ ရက်မှာ အောင်မြင်စွာ ပြုလုပ်ခဲ့ပြီး သင်တန်းဆင်းပွဲပြုလုပ်ခဲ့တယ်လို့ သိရပါတယ်။
အဲဒီအထူးလက်ဖြောင့် မွမ်းမံသင်တန်းမှာ အထူးစစ်ဆင်ရေးတပ်ဖွဲ့ – S.O.F၊ နဂါးနီစစ်ကြောင်း၊ ရေးဘီလူးတပ်ဖွဲ့၊ MSRF မှ အတွေ့အကြုံရှိထူးချွန်စနိုက်ပါရဲဘော်များအား သီးခြားစုဆောင်း၍ စာတွေ့ လက်တွေ့နှင့် လက်နက်မျိုးစုံံ၊ ပုံစံမျိုးစုံကို အချိန်တစ်လကြာသည်အထိ လက်တွေ့ လေ့ကျင့် ပစ်ခတ်တာတွေ ပြုလုပ်ခဲ့တယ်လို့ ဆိုပါတယ်။
ဒါဟာ တပ်ဖွဲ့အချင်းချင်း ပူးပေါင်းစစ်ဆင်ရေးများဆောင်ရွက်နိုင်ရန်နှင့် စစ်ဆင်ရေးတိုင်းတွင် စနိုက်ပါများအား အထူးကဏ္ဍအနေဖြင့် ဗျူဟာကျကျ ပိုမိုဆောင်ရွက်နိုင်ရန် ရည်ရွယ်တာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
အဆိုပါ မွမ်းမံသင်တန်းပြီးမြောက်ခဲ့သော အထူးလက်ဖြောင့်ရဲဘော် (၃၀) ဦးကို သက်ဆိုင်ရာနယ်မြေမှာရှိတဲ့ တပ်ရင်းတပ်ဖွဲ့အသီးသီးနဲ့ စစ်ကြောင်းတွေမှာ စစ်ဆင်ရေးတာဝန်များ ပေးအပ်ဆောင်ရွက်သွားမှာဖြစ်တယ်လို့ ဆိုပါတယ်။
ဓါတ်ပုံ – SOF
