လါမ့ၤ၁၉သီ၊၂၀၂၃နံၣ်
ကညီကီၢ်စဲၣ် မၠးဝတံၣ်ကလံၤထံးတကပာ် စွ့ၣ်ကိကိၣ်ဟီၣ်ကဝီၤပူၤ ပယီၤသုးစုဖီလာ်BGFသုးတဖၣ်ပာ်ဖှိၣ်ထီၣ်သးဒီးကဝီၤဒ့ပှၤဘၣ်မူဘၣ်ဒါတဖၣ်ဒီး ပာ်ဖှိၣ်သုးဖိအသီ တကးဒံးဘၣ်ဃ့စ့န့ၣ်ပှၤအိၣ်လၢစွ့ၣ်ကိကိၣ်သဝီပူၤတဂၤတဲဝဲဒၣ်န့ၣ်လီၤ
လၢစွ့ၣ်ကိကိၣ်န့ၣ်စးထီၣ်ဖဲလါမ့ၤ BGFသုးတဖၣ်ဒီးကဝီၤဒ့ပှၤဘၣ်မူဘၣ်ဒါတဖၣ်ဒီးပာ်ဖှိၣ်သုးဖိသီတပယူာ်ဃီန့ၣ်လီၤ
စွ့ၣ်ကိကိၣ် ကဝီၤဒ့ ၁၊ကဝီၤဒ့ ၂၊ကဝီၤဒ့ ၃၊ကဝီၤဒ့ ၄ ဒီး ကၠီးဖၠၣ်သဝီပူၤ သးနံၣ်၁၈နံၣ်တုၤ သးနံၣ် ၄၀ဖီလာ် ပှၤကညီနီၢ်ဂံၢ် ၃၀၀ဘျဲၣ် ဃၣ်ဃၣ် ဘၣ်တၢ်ပာ်ဖှိၣ်အီသုးဖိအသီန့ၣ်လီၤ
“တလဲၤတန့ၣ်ဘၣ် ကဝီၤဒ့တခါပူၤ ကိးဝဲ၄၅ဂၤ မ့ၢ်ဝံၤမၢဘူးဝဲမဲ၁၅ဂၤဒီး ပှၤဘူးမဲန့ၣ်တဖၣ်ကဘၣ်မၤဝဲလီၤ မ့ၢ်တအဲၣ်ဒိးမၤဝဲန့ၣ် ဘၣ်ဟ့ၣ်ပှၤအဂုၤအဂၤစ့ဒီးတုာ်ငါဝဲန့ၣ်လီၤ ဟ့ၣ်စ့မ့ၢ်တန့ၣ်ဘၣ်မၤလီၤ မ့ၢ်လဲၤတဘျီန့ၣ်ယံၢ် ၃နံၣ်န့ၣ်လီၤ”န့ၣ် ပှၤအိၣ်လၢစွ့ၣ်ကိကိၣ်တဂၤတဲဝဲလီၤ
တကးဒံးဘၣ် BGFသုးတဖၣ်အံၤဃ့စ့လၢပှၤဟဲတုာ်ငါသးဖိလၢတၢ်လီၢ်အဂုၤအဂၤတဖၣ်အိၣ်ပှၤလၢအိၣ်စွ့ၣ်ကိကိၣ်တဂၤတဲဝဲလီၤ
“ပှၤဟဲမၤတၢ်လၢတၢ်လီၢ်အဂုၤအဂၤအိၣ်လီၤ ဃ့ဝဲစ့ယိၤ ၁၅၀၀အိၣ်၂၀၀၀အိၣ်လီၤ အဝဲသ့ၣ်တဘၣ်မၤသုးဖိဘၣ် ဘၣ်ဟ့ၣ်စ့လၢပှၤထၢဖှိၣ်သုးဖိသီအဂီၤလီၤ ပှၤဟဲမၤတၢ်ဖိတဖၣ်တကိးဝဲဘၣ် ကိးဝဲထဲဟီၣ်ကဝီၤဖိလီၤ”န့ၣ်စွ့ၣ်ကိကိၣ်ဟီၣ်ကဝီၤဖိတဲဝဲန့ၣ်လီၤ
လၢစွ့ၣ်ကိကိၣ်န့ၣ်ဖဲအပူၤကွံာ် လါအ့ဖြ့ၣ် ၅သီဒီး၆သီ အနံၤတဖၣ်န့ၣ် တၢ်ဒုးကဲထီၣ်လၢ ပယီၤသုးBGFသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် အဘၢၢ်စၢၢ်တၢ်ဒုးကဲထီၣ်ဝံၤအလီၢ်ခံ BGFသုးတကပာ် သံအါအဃိ ဘၣ်ပာ်ဖှိက့ၤသုးဖိအသီဒ်အံၤန့ၣ် ပှၤလၢအိၣ်စွ့ၣ်ကိကိၣ်တဂၤတဲဝဲန့ၣ်လီၤ
