လါမ့ၤ၁၆၊၂၀၂၃နံၣ်
ကညီကီၢ်စဲၣ် ၊ကီးတရံးဝ့ၢ်အဃၢၢ် သဝီတဖၣ်အပူၤ ပယီၤသုးခးလီၤကျိဖးဒိၣ်အဃိ လီၤတဲၢ်ဘၣ်ဟံၣ်တဖျၢၢ်ဒီးဟးဂီၤဝဲန့ၣ်ဟီၣ်ကဝီၤဖိတဲဝဲအသိးသ့ၣ်ညါဘၣ်န့ၣ်လီၤ
ဖဲမဟါလါမ့ၤ ၁၅သီ မုၢ်ထူၣ် ၂နၣ်ရံၣ်တခီဃၣ်ဃၣ် အဆၢကတီၢ် ပယီၤသုးလၢဆီလီၤသးဖဲ ကီးတရံးခလရ ၉၇သုးခးလီၤကျိဖးဒိၣ်ဆူ တီၣ်ကၠၣ်အ့သဝီအဃၢၢ် နီၣ်တလၣ် သဝီပူၤအဃိ ဟံၣ်ဟးဂီၤတဖျၢၢ်န့ၣ် သဝီဖိတဂၤတဲဝဲဒၣ်န့ၣ်လီၤ
“၂နၣ်ရံၣ်တခီဃၣ်ဃၣ်အဆၢကတီၢ် ပယီၤသုးခးလီၤကျိဖးဒိၣ်အဃိ သဝီပူၤဟံၣ်တဖျၢၢ်မ့ၣ်အူအီၣ်ဟးဂီၤလီၤ အိၣ်ခးလီၤဝဲလၢကီးတရံးလီၤ ပှၤကညီဘၣ်ဒိတအိၣ်ဘၣ် ခးဝဲကျိဖးဒိၣ်သၢဖျၢၢ်ဃၣ်ဃၣ်လီၤ”န့ၣ် အဝဲတဲဝဲဒၣ်န့ၣ်လီၤ
ခီဖျိပယီၤသုးခးလီၤကျိဖးဒိၣ်ကိးမုၢ်နံၤဃၣ်ဃၣ်အဃိ သဝီပူၤဟီၣ်ကဝီၤဖိတဖၣ် ဘၣ်ဃ့ၣ်ပူၤဖျဲးဆူတၢ်ဘံၣ်ဘၢအလီၢ်ဆူဘူးတံၢ်တဖၣ်အိၣ်န့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
“ကတီၢ်ခဲအံၤ ဘၣ်ဃ့ၣ်ပူၤဖျဲးသးလီၤ ဘၣ်လဲၤအိၣ်ဆူသဝီအဂုၤအဂၤလီၤ လၢညါဟဲက့ၤတလီၢ်လီၢ်လီၤ အခဲအံၤဘၣ်ဟံၣ်ဃီတဘၣ်ပှၤကညီအဃိတၢ်ဘူၣ်ဂ့ၤလီၤ”န့ၣ်ဟီၣ်ကဝီၤဖိတဲဝဲဒၣ်န့ၣ်လီၤ
ခီဖျိပယီၤသုးခးလီၤကျိဖးဒိၣ်ကိးမုၢ်နံၤဃၣ်ဃၣ်အဃိ တီၣ်ကၠၣ်အ့သဝီဒီးနီၣ်တလၣ်သဝီပူၤကမျၢၢ်တဖၣ်ဘၣ်ဃ့ၣ်ပူၤဖျဲးသးန့ၣ်လီၤ နီၣ်တလၣ်သဝီပူၤပှၤကညီနီၢ်ဂံၢ်အိၣ် ၂၀၀ဃၣ်ဃၣ်ဒီးနီၢ်ဂံၢ် ၁၂၀ဃၣ်ဃၣ်အံၤစးထီၣ်ဖဲလါမ့ၤ တၢတနွံန့ၣ်ဘၣ်ဃ့ၣ်တၢ်ဒုးဆူ ခူၣ်နံၣ်၊ဖါကၠး၊သမ့ၣ်ဒိး၊သၣ်မညးဒီး ဖၣ်အၣ်ဝ့ၢ်တကပာ်န့ၣ်လီၤ
ဖဲအပူၤကွံာ် ၂၀၂၂နံၣ် လါဒံၣ်စ့ဘၢၢ်၁၁သီနံၤနာ်က့ ပယီၤသုးခးလီၤကျိဖးဒိၣ်အဃိ တီၣ်ကၠၣ်အ့သဝီပူၤဟံၣ်၂ဖျၢၢ် လီကဲၣ် သဝီပူၤဟံၣ်၄ဖျၢၢ်ဘၣ်ဒိဟးဂီၤန့ၣ်လီၤ
