လါမ့ၤ ၁၅သီ၊၂၀၂၃နံၣ်
ကညီကီၢ်စဲၣ် ကီးတရံးဝ့ၢ်ဒီးနိးတကီဝ့ၢ်အဘၢၢ်စၢၢ်ကျဲ ပယီၤသုးမၤဟးဂီၤအဃိ ကီးတရံးဝ့ၢ်ဒီးအဃၢၢ် သဝီတဖၣ်အပူၤ ဘၣ်သဂၢၢ်ဒီးတၢ်ကီတၢ်ခဲလၢအီၣ်အီအိၣ်ဆိးအဂီၤန့ၣ်ဟီၣ်ကဝီၤဖိတဲဝဲဒၣ်န့ၣ်လီၤ
ကီးတရံးဝ့ၢ်ဒီးနိးတကီဝ့ၢ်အဘၢၢ်စၢၢ် တီၣ်ကၠၣ်အ့သဝီကျဲတကပာ် ဖဲလါမ့ၤ၁၄သီ ဂီၤနၣ်ရံၣ် ၁၀ဃၣ်ဃၣ် စကခ ၁၉စုဖီလာ် ခလရ ၃၄၃ သုးဂံၢ်ဘါ ၅၀ ဃၣ်ဃၣ် မၤဟးဂီၤကွံာ်ကျဲဒီးဘူၣ်ဒိၣ်ဆၣ်န့ၣ်လီၤ
ခီဖျိတီၣ်ကၠၣ်အ့ကျဲဘၣ်တၢ်မၤဟးဂီၤဒ်အံၤအဃိ ကီးတရံးဝ့ၢ် ကၠူတုၢ်ဝ့ၢ်ဒီးအဃၢၢ်သဝီတဖၣ်အပူၤဟီၣ်ကဝီၤဖိတဖၣ်တၢ်ကီတၢ်ခဲအိၣ်ထီၣ်လၢအီၣ်အီအိၣ်ဆိးအဂီၤန့ၣ်လီၤ
“အခဲအံၤခီဖျိကျဲဟးဂီၤအဃိ တၢ်သူတၢ်သၣ်တၢ်ဒိးတၢ်လၣ်တဖၣ်ပဆှၢအီတန့ၣ်ဘၣ် ပှၤဆှၢထီၣ်ဒူၣ်ရ့ၣ်သၣ်ဒီးသၣ်ကပၢၢ်သၣ် ဆှၢထီၣ်တန့ၣ်လၢၢ်ဘၣ် အဃိမုၢ်ကျိၤဝဲၤကွာ် ဘၣ်ဒိန့ၣ်လီၤ မၠးဝတံၣ်ဝ့ၢ်ပူၤသိလ့ၣ်ဟဲထီၣ်န့ၣ်အဃိ သိပှ့ၤထီၣ်န့ၣ်လီၤသဝီပူၤပထုးထီၣ်စ့ wave moneyတန့ၣ်လၢၢ်ဘၣ်ဝ့ၢ်ပူၤနာ်က့တန့ၣ်အဃိ ဘၣ်ကီဘၣ်ခဲလီၤ”န့ၣ်တီၣ်ကၠၣ်အ့သဝီဖိတဂၤတဲဝဲဒၣ်န့ၣ်လီၤ
ခီဖျိကျဲဟးဂီၤအဃိ သဝီပူၤပှၤဆှၢထီၣ်တၢ်ဒိးတၢ်လၣ်တန့ၣ်အဃိ တၢ်ဖိတၢ်လံၢ်အပှ့ၤကထီၣ်အဂီၤတၢ်အိၣ်သးအိၣ်န့ၣ်ကီးတရံးဝ့ၢ်ဟီၣ်ကဝီၤဖိတဂၤတဲဝဲန့ၣ်လီၤ
“အခဲကးတံာ်ဃးကျဲ ပဆှၢထီၣ်တၢ်ဒိးတၢ်လၣ်တန့ၣ်ဘၣ် ဃုသးနာ်က့ဆှၢထီၣ်တန့ၣ်ဘၣ်အခဲအံၤဃုသးတတလီးန့ၣ် ၃၀၀၀ဘျဲၣ်လီၤခီဖျိကျဲကးတံၤသးအဃိ တၢ်ပှ့ၤကထီၣ်တၢ်အိၣ်သးအိၣ်”န့ၣ်ကီးတရံးဝ့ၢ်ဟီၣ်ကဝီၤဖိတဲဝဲဒၣ်န့ၣ်လီၤ
တကီၢ်ခါခဲအံၤ ပယီၤသုးမၤဟးဂီၤကွံာ် ကီးတရံးကလံၤစိး တီၣ်ကၠၣ်အ့ ကမဲၣ်ကိ လီက့ၣ် ဖါကၠးသဝီတကပာ်ကျဲ အဃိ ကီးတရံးဝ့ၢ်ဟီၣ်ကဝီၤဖိတဲဝဲဒၣ်န့ၣ်လီၤ
တကးဒံးဘၣ်ပယီၤသုး ခးလီၤကျိဖးဒိၣ်ကိးမုၢ်နၤဆူ ကီးတရံးဝ့ၢ်ပူၤန့ၣ်ဟီၣ်ကဝီၤဖိတဲဝဲဒၣ်န့ၣ်လီၤ
“အခဲတၢ်အိၣ်သးန့ၣ်ပယီၤသုးခးလီၤကျိဖးဒိၣ်ဆူကီးတရံးကလံၤထံးတကပာ်တပယူၢ်ဃီန့ၣ်လီၤ မၤတၢ်ထီၣ်ဒုးဆူသဝီတကပာ်န့ၣ်လီၤ မၤဟးဂီၤကျဲအဃိဟီၣ်ကဝီၤဖိတၢ်ကီတၢ်ခဲအိၣ်ထီၣ်လီၤ ဖဲမဟါန့ၣ်ပာ်ဃးသုးခူသူၣ်လၢတီၣ်ကၠၣ်အ့တကပာ်လီၤ တနံၤအံၤသုးက့ၤအလီၢ်ဆူသုးကျၢၢ်ကပာ်န့ၣ်”ကီးတရံးဟီၣ်ကဝီၤဖိတဲဝဲန့ၣ်လီၤ
ပယီၤသုးကးတံာ်ဃးတိၣ် ကီးတရံးဒီးနိးတကီ အဘၢၢ်စၢၢ် ဟီၣ်သရီ တိၣ်ဖဲလါမ့ၤ ၆ သီဒီးမၤဟးဂီၤက့ၤကျဲဖဲလါမ့ၤ ၁၄သီန့ၣ်သ့ၣ်ညါဘၣ်န့ၣ်လီၤ
