ရေးမြို့နယ်မြောက်ပိုင်းက ကျားဖြူစစ်ကြောင်း ၂ ရဲ့ နောက်တန်းစခန်း လေယာဉ်နဲ့ ဗုံးကြံခံရ၊ PDF သုံးကျ၊ လေးဦးဒဏ်ရာရ
မော်လမြိုင်၊ မေ၊ ၉
မွန်ပြည်နယ်၊ ရေးမြို့နယ် သံဖြူဇရပ်မြို့နယ်အကြားမှာ ရှိတဲ့ ကျားဖြူစစ်ကြောင်း ၂ ရဲ့ နောက်တန်းစခန်းတစ်နေရာကို စစ်ကောင်စီတပ်ဖွဲ့တွေက လေယာဉ်နဲ့ ဗုံးကြဲတိုက်ခိုက်ခဲ့တာကြောင့် PDF ရဲဘော်သုံးဦးကျဆုံးကာ လေးဦးထိခိုက်ဒဏ်ရာတွေ ရရှိခဲ့တယ်လို့ ကျားဖြူစစ်ကြောင်း၊ ကျားဖြူတပ်ခွဲ ၁ မှ သတင်းထုတ်ပြန်ထားပါတယ်။
ကျားဖြူစစ်ကြောင်း ၂၊ စစ်ကြောင်းရုံး၊ တပ်ခွဲ ၁၊ တပ်ခွဲ ၆ နောက်တန်းစခန်းတစ်နေရာကို မေလ ၇ ရက် ည ၁၁ နာရီခန့်က စစ်ကောင်စီတပ်တိုက်လေယာဉ်မှ ပေါင် ၅၀၀ ဗုံး ၂ လုံးကြဲပြီး တိုက်ခိုက်ခဲ့ရာမှာ ဗုံးတစ်လုံးက စခန်းအပေါ်တည့်တည့်ကို ကျရောက်ပေါက်ကွဲခဲ့ခြင်းဖြစ်ပါတယ်။
အဲနောက် မေလ ၈ ရက် နေ့လည် ၁၂ နာရီခန့်မှာတော့ စခန်းနဲ့ အနီးပတ်ဝန်းကျင်တနေရာကို စစ်ကောင်စီတပ်ဖွဲ့တွေက Mi – 35 ရာဟတ်ယာဉ်နဲ့ ဒုတိယအကြိမ် ထပ်မံပစ်ခတ်တိုက်ခိုက်ခဲ့တာပါ။
ဒီလိုမျိုး စစ်ကောင်စီတပ်ဖွဲ့တွေရဲ့ လေကြောင်းကနေတိုက်ခိုက်မှုကြောင့် ကျားဖြူတပ်ခွဲ(၁)မှ PDF ရဲဘော် ဇွဲမာန်လင်း၊ ရဲဘော် ထွန်းလင်းအောင်၊ ရဲမေ မခင်သန္တာဆွေတို့က သေဆုံးခဲ့တဲ့အပြင် ရဲဘော်လေးဦးက မစိုးရိမ်ရ ဒဏ်ရာတွေ ရရှိခဲ့တယ်လို့ ထုတ်ပြန်ထားပါတယ်။
လေကြောင်းတိုက်ခိုက်မှုကြောင့် ပြည်သူ့ကာကွယ်ရေးတပ်ဖွဲ့တွေရဲ့ အဆောက်အဦတွေ၊ ကားတွေ ပျက်စီးခဲ့တဲ့အပြင် အရပ်သားနေအိမ်တွေလည်း မီးလောင်ပျက်စီးဆုံးရှုံခဲ့သလို အရပ်သား ၃ ဦးထက်နည်းလည်း ထိခိုက်ဒဏ်ရာတွေ ရရှိခဲ့တယ်လို့ ဒေသခံတွေက ဆိုပါတယ်။
ဒါအပြင် ရေးမြို့နယ်မြောက်ပိုင်းက ကျေးရွာ လေးရွာမှ အရပ်သားတွေ ရာနဲ့ချီဘေးလွတ်ရာကို ထွက်ပြေးတိမ်း ရှောင်နေ ရတယ်လို့ ဒေသခံတစ်ဦးက ပြောပါတယ်။
“ ဝါပသဲရွာ၊ ချောင်းနှစ်ခွတို့ အဲဒီဘက်က ရွာငါးရွာလောက်ရှိမယ်၊ အဓိက ကရင်ရွာတွေပါ၊ အဲဒီကလူတွေ လေးရာ၊ ငါးရာလောက် အခု ပြေးနေရတယ်ပြောတယ်။ မနက်က မေးကြည့်တော့လည်း အိမ်မပြန်ရဲကြသေးဘူးတဲ့၊ လေယာဉ်နဲ့ ထပ်လာပစ်မှာ စိုးလို့တဲ့။” လို့ ပြောပါတယ်။
ယခုလေကြောင်းကနေ တိုက်ခိုက်ခံရတဲ့နေရာဟာဆိုရင် ကရင်အမျိုးသားအစည်းအရုံးကေအဲန်ယူတပ်မဟာ ၆ ထိန်းချုပ်ရာနယ်မြေ ဖြစ်ပြီး ရေးမြို့နယ်အနေနဲ့ကြည့်မယ်ဆိုရင် ဒါဟာ ပထမဆုံးအကြိမ်လေကြောင်းကနေ တိုက်ခိုက်ခံရတာလည်း ဖြစ်ပါတယ်။
ဓါတ်ပုံ – ကျားဖြူစစ်ကြောင်း
