ကျိုက်ထိုမှာ ဘုရားဖူးကားတစ်စီးတိမ်းမှောက်ရာမှာ တစ်ဦးသေဆုံးကာ ၃၀ ဦးကျော်ဒဏ်ရာရ
မော်လမြိုင်၊ မေ၊ ၅
မွန်ပြည်နယ်၊ ကျိုက်ထိုမြို့နယ်၊ မရမ်းချောင်းကျေးရွာ အဝေးပြေးကားလမ်းမပေါ်မှာ ဒီကနေ့ နံနက်ပိုင်းက ဘုရားဖူးကားတစ်စီး တိမ်းမှောက်မှုဖြစ်ပွားခဲ့ရာ တစ်ဦးသေဆုံးကာ ၃၀ ကျော် ထိခိုက်ဒဏ်ရာတွေ ရရှိခဲ့တယ်လို့ ဒေသခံတွေထံမှ သိရပါတယ်။
“ ကားက သူများကို ဝင်တိုက်တာမဟုတ်ဘူး၊ သူ့ဟာသူ အရှိန်မထိန်းနိုင်တဲ့သဘော၊ မှောက်သွားတာလေ၊ သေတာတော့ တစ်ဦးလို့ သိရတယ်၊ ဒဏ်ရာရတာက ၃၀ လောက်ရှိမယ်၊” လို့ ဒေသခံတစ်ဦးက ပြောပါတယ်။
ဒီကနေ့ နံနက် ၈ နာရီခန့်က ရန်ကုန်တိုင်း၊ သံလျင်မြို့နယ်မှ အလှူဒါယိကာတွေနဲ့ အတူ သံဃာတော်၊ ကိုရင်၊ အမျိုးသား၊ အမျိုးသမီး စုစုပေါင်း ၃၀ ကျော်လိုက်ပါစီးနင်းလာတဲ့ကားကြီးတစ်စီးဟာ မရမ်းချောင်ကျေးရွာလမ်းအကွေ့မှာ အရှိန်မထိန်းနိုင်ဘဲ တိမ်းမှောက်ခဲ့တာဖြစ်ပါတယ်။
မော်တော်ယာဉ်တိမ်းမှောက်မှုကြောင့် ယာဉ်ပေါ်မှာ လိုက်ပါလာတဲ့သူတွေထဲက အသက် ၃၀ အရွယ်အမျိုးသမီးတစ်ဦးသေဆုံးကာ ကျန်တဲ့ ၃၀ ကျော်က ထိခိုက်ပွန်းပဲ့ဒဏ်ရာ ရရှိခဲ့ပြီး အဲဒီထဲက ၆ ဦးထက်မနည်းက ဒဏ်ရာပြင်းထန်တယ်လို့ ဒေသခံတွေက ပြောပါတယ်။
ထိခိုက်ဒဏ်ရာရရှိခဲ့တဲ့သူတွေကို နယ်မြေခံလူမူကူညီရေးအသင်းအဖွဲ့တွေက လိုအပ်တဲ့ ကူညီမှုတွေ ပေးပြီး သိမ်ဇရပ်ဆေးရုံကို ပို့ဆောင်ပေးကာ ဆေးကုသမှု ခံယူနေကြတယ်လို့ ဆိုပါတယ်။
ဓါတ်ပုံ – Crd
