လါမ့ၤ ၂သီ၊၂၀၂၃နံၣ်
ကညီကီၢ်စဲၢ်၊ဖၣ်အၣ်ဝ့ၢ်ပူၤ ဟ့ၣ်ဝဲမ့ၣ်အူဒီးဆၢကတီၢ်ဒီး မ့ၣ်အူတဟဲကိးဆၢကတီၢ်ဒဲးအဃိ ဖၣ်အၣ်ဟီၣ်ကဝီၤဖိတဖၣ်ဘၣ်သဂၢၢ်ဒီး တၢ်ကီတၢ်ခဲန့ၣ်ဟီၣ်ကဝီၤဖိတဲဝဲဒၣ်န့ၣ်လီၤ
ဖၣ်အၣ်ဝ့ၢ်န့ၣ်ဆၢတဲာ်ဝဲသၢတီၢ်ဒီး မ့ၣ်အူဟဲ၂နၣ်ရံၣ် တဟဲ၄နၣ်ရံၣ် ဒီး မ့ၣ်အူဟဲဆၢကတီၢ်ဆှၤအဃိ ဖၣ်အၣ်ဝ့ၢ်ဟီၣ်ကဝီၤဖိတဖၣ်ကိးမုၢ်နံၤအီၣ်အီအိၣ်ဆိးအဂီၤဘၣ်သဂၢၢ်ဒီးတၢ်ကီတၢ်ခဲန့ၣ်ဟီၣ်ကဝီၤဖိတဂၤတဲဝဲဒ်အံၤလီၤ
“တနံၤညါအဝဲသ့ၣ်ဟ့ၣ်မ့ၣ်အူပတဲသ့လၢဟဲဂ့ၤလီၤ လၢညါအနံၤခါမ့ၣ်အူဟဲသံဟဲသံလီၤ လၢဟံၣ်ကဖီအီၣ်တၢ်အဂီၤဘၣ်တီၢ်ထီၣ်ထံ မ့ၣ်အူတဟဲအဃိဘၣ်ဖီဒီးgasလီၤ စ့လၢၢ်အါထီၣ်လီၤ ထံမ့ၢ်တအိၣ်နာ်က့မ့ၣ်အူတဟဲအဃိမၤတဘၣ်ဘၣ် ခီဖျိပပှ့ၤဆါပှၤဘီဟံၣ်တၢ်ပီးတၢ်လီအဃိပဘၣ်ကွာ်ထံဂ့ၤတဂ့ၤလီၤ မ့ၣ်အူတဟဲအဃိကွာ်ထံတန့ၣ်ဒီးတၢ်ဆါတၢ်ပှ့ၤဆှၤန့ၣ်လီၤ”
တကးဒံးဘၣ်ဖၣ်အၣ်ဝ့ၢ်ပူၤခီဖျိမ့ၣ်အူဟဲဒီးဆၢကတီၢ်အဃိ ဖဲမ့ၣ်အူဟဲအခါဘၣ်ဖီမ့ၤ ဘၣ်တီၢ်ထီၣ်ထံတဘျီဃီအဃိ ဘၣ်ဟ့ၣ်မ့ၣ်အူပှ့ၤအါန့ၣ်ဒံးလၢညါန့ၣ်ဖၣ်အၣ်ဝ့ၢ်ဟီၣ်ကဝီၤဖိတဲဝဲဒၣ်န့ၣ်လီၤ
“ခီဖျိမ့ၣ်အူဟဲဒီးဆၢကတီၢ်အဃိ မ့ၣ်အူမ့ၢ်ဟဲဘၣ်ဖီမ့ၤဘၣ်ဖီကသူဘၣ်တီၢ်ထီၣ်ထံတဘျီဃီဒီးထုးမ့ၣ်အူဂံၢ်အါန့ၣ်လီၤ အဃိ တလါန့ၣ် မ့ၣ်အူလဲလၢၢ်၅၀၀၀၀ဘးဃၣ်ဃၣ်န့ၣ်လီၤ အခဲမံၣ်တၣ်တယူၣ်နံးန့ၣ် ၃၅ဘးလီၤ မ့ၢ်တသူမ့ၣ်အူနာ်က့ဘၣ်သူgasဒီးသွဲၣ်လးအဃိတၢ်လၢၢ်ဘူၣ်လၢၢ်စ့ၢ်အါ”န့ၣ်ဖၣ်အၣ်ဝ့ၢ်လီၢ်ကဝီၤဖိတဂၤတဲဝဲဒၣ်န့ၣ်လီၤ
တကီၢ်ခါခဲအံၤဖၣ်အၣ်ဝ့ၢ်ပူၤဟ့ၣ်မ့ၣ်အူဒီးဆၢကတီၢ်နာ်က့လၢပယီၤသုးစုဖီလာ်ရူတဖၣ်ဒူမ့ၣ်အူဟဲ၂၄နၣ်ရံၣ်န့ၣ်သ့ၣ်ညါဘၣ်န့ၣ်လီၤ
“ဝ့ၢ်ပူၤတၢ်လီၢ်တဖၣ်ဒူဟ့ၣ်မ့ၣ်အူဒီးဆၢကတီၢ်လၢကီၢ်စဲၢ်ကပာ်ရူ၊ရူပာ်ဖှိၣ်တဖၣ်မ့ၣ်အူဟဲကိးဆၢကတီၢ်လီၤ အိၣ်ဝဲဒီး VIP မ့ၣ်အူလီၤ ပှၤအိၣ်လၢရူကပာ်တဖၣ်ဒူမ့ၣ်အူတဟးဂီၤဘၣ်”န့ၣ်ပှၤအိၣ်လၢကီၤစဲၢ်ရူကပာ်တဂၤတဲဝဲဒၣ်န့ၣ်လီၤ
ကတီၢ်ခဲအံၤ ကညီကီၢ်စဲၢ်အပူၤကီၢ်ဆၣ် ၆ဘ့ၣ်ဘၣ်သဂၢၢ်ဒီးမ့ၣ်အူတဟဲတၢ်ဂ့ၤကီန့ၣ်စးထီၣ်လၢပယီၤသုးဟံးန့ၣ်ထံကီၢ်တၢ်စိကမီၣ်ဝံၤအလီၢ်ခံ ၂၀၂၁တုၤ၂၀၂၃လါမ့ၤန့ၣ်လီၤ
