စစ်အာဏာရှင် ၊ လောင်းကစားဝိုင်းများနှင့် ပြည်သူတို့၏ အသက်အန္တရာယ် (သတင်းဆောင်းပါး)

စစ်ကောင်စီက အာဏာသိမ်းလိုက်ပြီးတာနဲ့တပြိုင်နက် လောင်းကစားရုံများဟာ ရပ်ကွက်တိုင်းမှာ ဖွင့်လှစ်လာကြတဲ့အတွက် ခိုးဆိုးလုနှိုက် သမားများလဲပိုမိုများပြားလာပြီးတော့ ဒေသခံပြည်သူများရဲ့လုံခြုံရေးဟာလည်း စိုးရိမ်မှုများစွာနဲ့ သွားလာ လှုပ်ရှားနေရတာပဲဖြစ်ပါတယ်။

နေ့ညမပြတ်၊မိုးလင်းပေါက်ဖွင့်လှစ်ထားတဲ့ လောင်းကစားရုံများကြောင့် ငွေကြေးအလွယ်တကူရနိုင်တဲ့ ခိုးဆိုးလုနှိုက်မှု့ဟာ ယခင်ကထက်ပေါများလာပြီး အသက်အန္တရာယ်ခြိမ်းခြောက်ကာ လုယက်မှု့များပိုမို ပြုလုပ်လာကြတာပဲ ဖြစ်ပါတယ်။

ယုဇန ရပ်ကွက်အတွင်းမှာရှိတဲ့ အလောင်းကစားဝိုင်းကြီးမှာတော့ ဖွင့်ပွဲကိုအကြီးအကျယ်ပြုလုပ်ကာ စစ်တပ်နဲ့ပတ်နွယ်တဲ့ သူများဖွင့်ထားကြောင်းနဲ့ မတ်လ ဒုတိယအပတ်တုန်းက အမည်မသိလက်နက်ကိုင်တချို့က ဆိုင်တွင်းတာဝန်ရှိသူများကို ခေါ်သွားကြောင်းလဲ သိရပါတယ်။ အဲ့ဒီလောင်းကစားဝိုင်းအတွင်း ရန်ဖြစ်ပြီးသောင်းကျန်းပါက စစ်ကောင်စီလက်အောက်ခံများကို ခေါ်ဆောင်သွားခိုင်းကြောင်း ရပ်ကွက်တွင်းနေထိုင်သူထံမှ သိခဲ့ရပါတယ်။

စစ်တပ်ကအာဏာသိမ်းပြီးနောက်ပိုင်းမှာ လောင်းကစားဝိုင်းတွေ ပေါ်ပေါ်ထင်ထင် ဖွင့်လှစ်လာကြပြီး ဓားပြတိုက်ခံရမှု၊ ဆိုင်ကယ်လုယက်ခံရမှု၊ မီးကြိုးခိုးခံရမှု များအပြင် လူသတ်မှုများဟာ မကြာခဏဖြစ်ပွားနေတာကြောင့် ပြည်သူများရဲ့ဘဝလုံခြုံရေးဟာ စိုးရိမ်နေကြရတာပါ။

မြစ်ကြီးနားမြို့ပေါ်မှာ လုယက်မှုများဟာ မကြာခနဖြစ်ပွားနေတာကြောင့် ဒေသခံပြည်သူများအကြာ းစိုးရိမ်မှုများ အဆမတန်မြင့်တက်နေပါတယ်။

“ လွန်ခဲ့တဲ့ တစ်လပိုင်းတုန်းက Beauty Sloon ဆိုင်ပိုင်ရှင်တဦး ကိုပစ္စည်းတွေလုပြီး ဓားဒဏ်ရာတွေနဲ့ အသေသတ်ပြီး မြစ်ဆိပ်နားမှာ လာပစ်ထားတယ်” လို့ လူမှုကူညီရေးအသင်းမှ တာဝန်ရှိသူပြောပြချက်အရ သိရပါတယ်။

၎င်းဖြစ်ရပ်အပြင် မတ်လ ၁၅ ရက်နေ့ ညနေ ၆ နာရီခွဲခန့်က တပ်ကုန်းရပ်ကွက်နဲ့ စီတာပူရပ်ကွက်အကြား၊ နောင်ရာပါကွင်းထဲမှာ ဆိုင်ကယ်လုခံရကာ ဓါးထိုးခံရမှုဖြစ်စဉ်တွေကလဲ သက်သေထူလျက် ရှိနေပါတယ်။

ဒါ့အပြင် မြစ်ကြီးနားမြို့ ရပ်ကွက်၊ ကျေးရွာများရှိ လူသွားလူလာပြတ်တဲ့ လမ်းကြိုလမ်းကြားများမှာ စောင့်ကြည့်ပြီး လုယက်နေကြသလို စားသောက်ဆိုင်များရှေ့မှာ ထိုးထားတဲ့ ဆိုင်ကယ်များကို လူမရှိလျှင် မရှိသလို နေ့ခင်းကြောင်တောင်မှာပဲ ခိုးဆိုးလုယက်နေတာတွေကို နေရာအနှံ့တွေ့လာရတယ်လို့ အင်ဂျန်ဒုံရပ်ကွက်ရှိ ဒေသခံတစ်ဦးက ဆိုပါတယ်။

“ အန်တီတို့ လမ်းမှာဆို လူလဲပြတ်တော့ တစ်ယောက်တည်းဆို ဘယ်တော့မှ မသွားရဲဘူး၊ ရိုက်ပြီးတွန်းလှဲပြီး လုတယ်၊ ဓားပြပြီးခြိမ်းခြောက်တယ်၊ မိတော့မိတယ် သူတို့ကို စစ်မေးတော့ မူးယစ်ဆေးဝါးကြောင့် လဲမဟုတ်ဘူး၊ အလောင်းစားဝိုင်းမှာ ရှုံးလို့ အခုလိုလိုက်လုကြတာများတယ်” လို့ဆိုပါတယ်။

အာဏာသိမ်းပြီးနောက်ပိုင်းမှာ ဖမ်းဆီးမှုလျော့နည်းလာပြီး မူးယစ်ဆေးဝါး ရောင်းဝယ်မှုများ၊ အလောင်းကစားရုံများနဲအတူ ခိုးဆိုးလုယက်မှုတွေက ပိုမိုကျယ်ပြန့်လာနေတာပါ။

လောင်းကစားပြုလုပ်သူတွေထဲမှာ လူလတ်ပိုင်းတွေသာ သိသိသာသာများပြားလာပြီး သန့်သန့်ပြန့်ပြန့် ဝတ်ဆင်ထားကာလုံးဝထင်ရက်စရာမရှိ သူတွေများသာဖြစ်ပါတယ်။

ပြည်သူများရဲ့ ဘဝဟာပိုမိုခက်ခဲလာတဲ့အပြင် လုံခြုံမှု့မရှိခြင်း၊ မြန်မာငွေတန်ဖိုးကျဆင်းလာခြင်း၊ လူငယ်များအတွက် အလုပ်ကိုင်ရှားပါးလာခြင်းဟာ နိုင်ငံရေးကိုအမြတ်ထုတ်စီးပွားရေးလုပ်နေတဲ့ စစ်ကောင်စီအာဏာသိမ်းတဲ့နေ့က စတင်ဖြစ်ပေါ်လာတဲ့ နောက်ဆက်တွဲအကျိုးဆက်များသာ ဖြစ်ပါတယ်။

မြစ်ကြီးနားမြို့မှာ လောင်းကစားရုံတွေနဲ့အတူ ခိုးမှု ၊ လုယက်မှု ၊ ဓါးပြတိုက်မှု ၊ လူသတ်မှုတွေက ဒွန်တွဲပါလာတာကြောင့် ပြည်သူတွေအနေနဲ့ စိုးရိမ်ထိတ်လန့်မှုတွေက တနေ့ထက်‌တနေ့ မြင့်တက်လို့ နေပါတယ်။

လောင်းကစားဝိုင်းကြောင့် ပြည်သူတွေရဲ့ အသက်အန္တရာယ်ထိခိုက်မှု မြင့်တက်လာခြင်းရဲ့နောက်မှာ စစ်ကောင်စီရဲ့ပရောဂပါနေတာဟာ ငြင်းပယ်မရတဲ့အမှန်တရားပါပဲ။

ဆောင်းပါး – ယပလက်

စာတည်း – နွေဦး